​Um egglosprófFlestir sem hafa verið að reyna að búa til barn lengur en fáeina mánuði fara fljótlega að velta því fyrir sér hvort þeir séu að hitta á réttu dagana. Flestir sem eiga við ófrjósemi að stríða kannast við að eyða miklum peningum í egglospróf af ýmsu tagi, svo ekki sé minnst á þungunarprófin. Oft kann að vera betri hugmynd að sleppa egglosprófunum og spara sér þannig þúsundir króna, en kaupa sér í staðinn stafrænan hitamæli og fylgjast með morgunhitanum og útferðinni frá leggöngunum á hverjum degi í staðinn. Hvort tveggja breytist þetta í gegnum tíðahringinn.
Ef konur læra að lesa úr þessum merkjum líkamans, getur það veitt mikilsverðar heilsufarsupplýsingar sem geta gagnast vel í óvissunni sem fylgir ófrjóseminni. Með þessari aðferð er hægt að fullvissa sig um hvort egglos hafi orðið í tíðahringnum, og fá í leiðinni ýmsar aðrar nytsamlegar upplýsingar, sem m.a. geta útilokað ýmsar orsakir fyrir ófrjóseminni.
Ein besta bók um hitastigsaðferðina sem til er á markaðnum heitir Taking Charge of Your Fertility eftir Toni Wechsler, MPH. Hún útskýrir leyndardóma tíðahringsins á mjög einfaldan og greinargóðan hátt og getur þannig hjálpað fólki að ná árangri í baráttunni við ófrjósemi. Hægt er að mæla með þessari bók fyrir allar konur á barneignaraldri.
Toni Wechsler gerir í bók sinni grein fyrir nokkrum göllum egglosprófanna, sem fylgja hér á eftir.
Ástæður þess að egglospróf geta gefið villandi upplýsingar

1. Egglosprófin prófa aðeins magn hormónsins LH í líkamanum, en magn þess eykst mikið rétt fyrir egglos, en segja ekki til um það hvort egglos fylgir örugglega í kjölfarið. Til er sjúklegt ástand (sem heitir á ensku Luteinized Unruptured Follicle syndrome) þar sem magn LH snöggeykst eins og hjá öðrum konum, en egglos verður ekki þrátt fyrir það. Egglospróf gefa konum sem svo er ástatt um, falskt jákvætt svar.
2. Konur sem eru með sjúkdóminn blöðrur á eggjastokkum geta fengið nokkra litla toppa í magni LH áður en toppurinn sem veldur egglosi kemur. Það þýðir að konur með blöðrur á eggjastokkum geta fengið jákvætt egglospróf of snemma og þar af leiðandi tímasett samfarir vitlaust, þannig að sæðið deyr áður en egglos verður. Þess utan geta konur sem hafa blöðrur á eggjastokkum framleitt mikið magn af LH án þess að egglos verði í framhaldinu.
3. Egglosmælar gefa engar vísbendingar um það hvort legháls konunnar framleiðir nógu frjósamt slím til að sæði manns hennar nái að synda upp á móts við eggið. Ef svo er ekki, skiptir litlu máli hvort egglos verður eða ekki því sæðið kemst ekki alla leið.
4. Oftast nær eru dyggustu kaupendur egglosprófa konur sem eru með óreglulegan tíðahring. Venjuleg egglospróf duga aðeins í fáeina daga, og ef konan er talsvert óregluleg, getur verið erfitt að átta sig á því hvenær er best að byrja að prófa. Þegar svo háttar til, er best að fylgjast með útferðinni úr leggöngunum. Eftir að tíðum lýkur er oftast engin eða nær engin útferð frá leggöngunum í fáeina daga. Þegar útferðin byrjar að aukast og verður „blautari“ og/eða teygjanlegri en áður er rétt að byrja að nota prófin.
5. Leiðbeiningar egglosprófanna gera yfirleitt ekki ráð fyrir því að konur hafi óvenju stutt gulbússkeið. Því geta konur sem hafa stutt gulbússkeið í sínum tíðahring túlkað leiðbeiningarnar þannig að þær byrja að prófa of snemma.
6. Hafa þarf í huga að sum frjósemislyf geta gefið falskar niðurstöður í egglosprófum, þar sem þau innihalda HCG (þungunarhormón) sem líkist LH (hormóninu sem prófið mælir) mjög að efnauppbyggingu. Svo er ekki farið um algengasta frjósemislyfið, Pergotime, en læknirinn ætti að geta svarað þeirri spurningu hvort frjósemislyf sem þú hefur fengið ávísað, getur valdið falskri niðurstöðu úr egglosprófi.

Hægt er að kaupa bók Toni Wechsler á Amazon.com og skoða kafla úr henni á TCOYF.com.