tilvera

Tilvera hlýtur styrk úr Samfélagssjóði Landsbankans

Fri, 08 May 2026 14:08:22 GMT

Tilvera hlýtur samfélagsstyrk frá Landsbankanum

Tilvera hefur í fyrsta sinn hlotið samfélagsstyrk frá Landsbankanum. Styrkurinn er veittur úr Samfélagssjóði Landsbankans sem styður verkefni sem hafa jákvæð samfélagsáhrif og stuðla að velferð og uppbyggingu í samfélaginu.

Styrkurinn mun nýtast Tilveru við áframhaldandi þróun og eflingu starfs félagsins með það að markmiði að styðja enn betur við þau verkefni og þá þjónustu sem félagið sinnir.

Við hjá Tilveru erum afar þakklát fyrir stuðninginn og það traust sem felst í þessari styrkveitingu. Það er sérstaklega ánægjulegt að fá þessa viðurkenningu frá Landsbankanum í fyrsta sinn og hún veitir okkur aukinn kraft til áframhaldandi verkefna.

Frétt Landsbankans um úthlutunina má lesa hér:

Samfélagssjóður Landsbankans styrkir 32 verkefni - Landsbankinn

Tilkynning til fjölmiðla

Fri, 12 Dec 2025 09:15:31 GMT

Áskorun um alþjóðleg mörk á fjölda barna á hvern sæðis- eða eggjagjafa: sjónarhorn sjúklinga

Í ljósi frétta Rúv 10. og 11. desember um að a.m.k. 197 börn í Evrópu og a.m.k. 4 börn af þeim fædd á Íslandi hafi verið getin með sæði manns með lífhættulegan genagallan [1,2].

Viljum við sem sjúklingasamtök sem starfa fyrir hönd einstaklinga og fjölskyldna sem glíma við ófrjósemi á Íslandi lýsa yfir eindregnum stuðningi við nýlega sameiginlega yfirlýsingu siðaráða Svíþjóðar, Danmerkur, Finnlands og Noregs, frá í apríl, þar sem kallað er eftir alþjóðlegri reglusetningu sem takmarkar fjölda barna sem geta orðið til frá sama sæðis- eða eggjagjafa [3].

Í dag eru engar lagalegar takmarkanir á fjölda barna sem getin eru með gjafafrumum frá hverjum gjafa. Dæmi eru frá erlendum sæðis- og eggjabönkum þar sem á bilinu 25-75 fjölskyldur hafa fengið frá einum og sama gjafanum. Samkvæmt norskum heilbrigðisyfirvöldum eru um 83% einstaklinga sem getnir eru með gjafasæði í Noregi getnir með innfluttu sæði, aðallega frá Danmörku. Í Finnlandi voru 21% allra gjafa frá öðru landi árið 2023.

Á Íslandi eru engin lög sem kveða á um hámarksfjölda einstaklinga sem mega þiggja gjafafrumu frá einum og sama gjafa. Íslenskar frjósemisstofnanir hafa þó sett sér eigin viðmið, þar sem sami gjafi má aðeins gefa tveimur fjölskyldum, vegna smæðar samfélagsins. Fjöldi íslendinga leitar þó enn út fyrir landsteinana í frjósemismeðferðir og þá er möguleiki fyrir hendi að kynfrumur frá einum og sama gjafanum séu nýttar af fleiri fjölskyldum en þeim sem þegar hafa þegið kynfrumur frá viðkomandi gjafa hér á landi.

Frá sjónarhóli einstaklinga sem getnir eru með gjafafrumum, gjafana sjálfra og þeirra sem þiggja gjafafrumur þá vekur skortur á lögbundnu hámarki ekki eingöngu upp siðferðisleg- eða læknisfræðileg álitamál heldur hafa þessi mál einnig djúpstæð áhrif á sálarlíf þessara einstaklinga.

Hámark þarf að vera á hvern eggja- og sæðisgjafa: athugasemdir sjúklinganna

Með framförum í erfðarannsóknum á undanförnum árum sem og með opnari umræðu um getnað barna með aðstoð gjafafruma hefur skortur á alþjóðlegu hámarki á fjöldi gjafa hvers frumugjafa leitt í ljós raunveruleg vandamál. Þannig hafa einstaklingar sem getnir eru með gjafafrumum uppgötvað að þeir deila sama gjafa með tugum, jafnvel yfir hundrað, annarra víðsvegar um heiminn, oft án þess að hafa haft nokkra vitneskju. Ljóst er að slík uppgötvun getur haft umtalsverð áhrif á sálarlíf einstaklingsins.

Fyrir gjafa getur tilhugsunin um að fjöldi barna munu hugsanlega leita eftir sambandi við viðkomandi á lífsleiðinni verið yfirþyrmandi og íþyngjandi. Fyrir fólk sem þiggur gjafafrumur getur það verið óþægilegt að vita ekki hversu margar aðrar fjölskyldur tengjast sama gjafa og hvort barn þeirra gæti óafvitandi rekist á einstakling getin með kynfrumu frá sama gjafa.

Þetta eru ekki fræðileg heldur raunveruleg vandamál sem fjöldi fólks stendur nú þegar frammi fyrir. Þetta er fólk sem við erum í forsvari fyrir.

Við krefjumst aðgerða

Við ítrekum ákall siðaráða Norðurlanda um:
● Alþjóðlegt lögbundið hámark verði sett á fjölda fjölskyldna sem nýtt geti gjafafrumur frá einum og sama gjafanum óháð landamærum, með hliðsjón af aukinni notkun gjafafruma yfir landamæri;
● Aukið gagnsæi gagnvart bæði gjöfum og fólki sem þiggur gjafafrumur, þar á meðal fulla upplýsingagjöf um landsbundin og alþjóðleg hámörk áður en gjöf eða meðferð fer fram;
● Að sæðis- og eggjabankar setji nú þegar tímabundið hámark þar til slíkt hámark hefur verið bundið í lög, og að frumugjafar eigi rétt á að ákveði sjálfir hámark gjafa sem er lægra en bankinn gefur upp;
● Aðgang að viðeigandi sálfræðiráðgjöf fyrir einstaklinga sem getnir eru með frumugjöfum, fjölskyldur þeirra sem og gjafa.

Markmiðið er ekki að hefta æxlunarfrelsi, heldur að gæta að velferð og vellíðan allra sem koma að getnaði barns með aðstoð gjafafruma. Við teljum að Norðurlöndin og Evrópa í heild sinni verði að sameinast um að bregðast við þessum áskorun.

Áskorun okkar

Við hvetjum stjórnvöld hér heima sem og innan Evrópu til að hlusta á ákall sjúklinga, fjölskyldna og kynfrumugjafa. Ófrjósemi er læknisfræðilegt ástand sem á skilið læknisfræðilega- og örugga meðferð, en notkun gjafafruma verður jafnframt að vera siðferðileg og traust.

Vinnum saman að því að tryggja að réttindi einstaklinga sem getnir eru með frumugjöfum séu virt, að gjafir frá frumugjöfum verði ekki ofnotaðar og að fjölskyldur sem þess þurfa geti nýtt sér tæknifrjóvgun af öryggi og virðingu.

Tilvera, samtök um ófrjósemi, hefur ásamt The Nordic Fertility Network unnið að ályktun um alþjóðlega reglugerð um gjafakynfrumur. Auk Tilveru í tengslakerfinu: Fertilitet og tab (DK), Simpukka ry (FI), Ønskebarn (NO) og Riksförbundet ofrivillig barnlöshet (SE).

Undirritað:

Stjórn Tilveru, María Rut Baldursdóttir, Erla Rut Haraldsdóttir, Sigríður Auðunsdóttir, Anna Þorsteinsdóttir, Jenny Elisabet Eriksson og Alda Magnúsdóttir Jackobsen

[1] https://www.ruv.is/frettir/innlent/2025-12-10-197-born-getin-med-saedi-manns-med-lifshaettulegan-genagalla-islensk-born-thar-a-medal-461140

[2] https://www.ruv.is/frettir/innlent/2025-12-10-fjogur-born-a-islandi-getin-med-saedi-kjelds-461263

https://www.ruv.is/frettir/innlent/2025-12-12-reiknar-med-frumvarpi-um-taeknifrjovgun-a-naesta-thingi-461373

[3] https://etene.fi/documents/66861912/0/Nordic+statement+english_final.pdf/94e3628d-017f-ac2d-6e64-499fcb1ce790/Nordic+statement+english_final.pdf?t=1742995397284

Vinningsnúmer í jólahappdrætti Tilveru

Thu, 11 Dec 2025 23:15:50 GMT

Útdráttur úr árlega jólahappdrætti Tilveru.

Dregið hefur verið í árlega jólahappdrætti Tilveru. Við viljum óska vinningshöfum til hamingju með vinningana. – og um leið þakka ykkur öllum kærlega fyrir þátttökuna og stuðninginn við starf Tilveru. Þessi stuðningur skiptir okkur gríðarlega miklu máli og gerir okkur kleift að styðja við fólk í ófrjósemisbaráttunni.

Sérstakar þakkir fá einnig öll þau fyrirtæki sem sýndu okkur stuðning og gáfu vinninga – án ykkar væri þetta happdrætti ekki mögulegt.

Hér fyrir neðan má sjá heildarlista vinninga og vinningsnúmera:

1. Vigt bakki og vigt kerti – 4168
2. Kerti, eldspýtur og jólasveinaspil – 4024
3. Gjafabréf frá Vár í vax, bodylotion sem dregur úr hárvexti – 5014
4. Brjóstapumpa, taubleyjur og brjóstahlífar – 4025
5. Sjampó og Inga Elín bolli – 5018
6. Hrafnhildur silkislæða – 5030
7. Hrafnhildur silkislæða og gjafabréf – 4144
8. Gjafabréf í litun og plokkun hjá Vár, förðunarvörur og naglalakk – 4181
9. Gjafasett frá Z-krem og gjafabréf frá Bakarameistaranum – 4116
10. Gjafasett frá Z-krem og Bakarameistaranum – 5002
11. Gjafasett frá Z-krem og Bakarameistaranum – 4163
12. Gjafasett frá Z-krem og Bakarameistaranum – 4073
13. Gjafabréf frá Apótekaranum og vörur frá Muna – 4133
14. Gjafapakki frá Neostrata – 4113
15. Gjafabréf á námskeið Financial Bootcamp frá Berg Coaching – 4160
16. Gjafabréf fyrir 3 mánaða fjármálaþjónustu frá Berg Coaching – 5026
17. Skynörvunardót, Nóa Síríus súkkulaði og jólasveinaspil – 4169
18. Gjafabréf frá Lifetrack í 6 mánuði – 5003
19. Gjafabréf frá Lifetrack í 6 mánuði og Nóa Síríus súkkulaði – 4093
20. Gjafabréf fyrir 2 í hvalaskoðun frá Eldingu og Nóa Síríus súkkulaði – 4152
21. Aveda pakki og gjafabréf í pizzu frá Shake & Pizza – 4155
22. Sjóböðin Húsavík fyrir 2, gjafabréf frá Shake & Pizza og Nóa Síríus súkkulaði – 4029
23. Gjafabréf fyrir 2 í brunch á Finnson Bistro og fyrir 2 í pílu á Oche – 4114
24. Börnin baka bók, ornament frá Dvalin & Durinn og gjafabréf frá Skopp – 4030
25. Gjafakort í Fotomax og gjafapoki frá Cu2 – 4120
26. Metabolic gjafabréf í 3 mánuði – 4129
27. Metabolic gjafabréf í 3 mánuði – 4176
28. Eldabuskan gjafabréf (10.000 kr.), Oche gjafabréf í pílu fyrir 2 og jólasveinaspil – 4167
29. Eldabuskan gjafabréf (10.000 kr.) og gjafabréf í karókí fyrir allt að 14 manns hjá Oche – 5027
30. Eldabuskan gjafabréf (10.000 kr.), Oche píla fyrir 2 og jólasveinaspil – 4007
31. Gjafabréf fyrir 2 í Krauma og ornament frá Dvalin & Durinn – 5035
32. Gjafabréf frá Eldhestum, reiðtúr fyrir 2 og jólasveinaspil – 4064
33. Gjafabréf á Financial Bootcamp frá Berg Coaching – 4011
34. Gjafabréf á Financial Bootcamp frá Berg Coaching – 4124
35. Gjafabréf frá Fotomax, Nings og Keiluhöllinni (keila fyrir 2) – 4046
36. Prent frá Hjalta Parelius – 5023
37. 500.000 kr. inneign í flísalögn frá Múrtækni – 4084

Við þökkum öllu því frábæra fólki sem gaf vinninga og öllum ykkur sem keyptu miða og styrktu þannig starf Tilveru.

Takk fyrir stuðninginn – hann skiptir miklu máli.

Vitundarvakningarvika 2025

Mon, 10 Nov 2025 13:29:37 GMT

Vitundarvakningarvika 2025

Dagana 1.–9. nóvember stóð Tilvera fyrir vitundarvakningarviku í tilefni Evrópsku vitundarvakningarvikunnar um ófrjósemi. Vikan einkenndist af samstöðu, fræðslu og opnum samtölum um málefni sem snerta fjölda fólks. Markmiðið var að efla vitund og skilning á ófrjósemi, stuðningi og frjósemisfræðslu — og skapa vettvang þar sem umræðan er bæði nærandi og uppbyggileg.

Fulltrúar Tilveru voru sýnilegir víða í fjölmiðlum og vöktu athygli með viðtölum og greinaskrifum.
Formaðurinn María Rut, gjaldkerinn Sigríður og ritari félagsins Anna ræddu málefnið bæði á Rás 1 og í Reykjavík Síðdegis á Bylgjunni, þar sem áhersla var lögð á að aðgengi að frjósemismeðferðum mætti ekki ráðast af efnahag.

Auk þess birtust þrjár áhrifamiklar skoðanagreinar á Vísi sem fjölluðu um frjósemisvitund ungs fólks, samfélagslega ábyrgð í málefnum ófrjósemi og mikilvægi þess að þekking á frjósemi sé ekki lúxus, heldur lífsnauðsyn. Hægt er að lesa greinarnar með því að fara í flipann Tilvera í fjölmiðlum undir flokknum Um Tilveru hér á heimasíðunni.

Í tilefni vikunnar stóð félagið fyrir sölu á varningi og happdrætti í Smáralind og Kringlunni. Þar gafst almenningi tækifæri til að leggja félaginu lið, kynna sér starfsemina og eiga samtal.

Hápunktur vikunnar var þó skemmtikvöld Tilveru sem haldið var í Sigtúni 42. Þar fylltist húsið af hlátri, fróðleik og gleði þegar félagsfólk og gestir komu saman til að fræðast, skemmta sér og fagna samstöðu.
Kynfræðingurinn Áslaug Kristjánsdóttir hóf kvöldið með opinskáu og áhugaverðu erindi um kynlíf og ófrjósemi.. Þá tók Hermosa.is við með létta og forvitnilega kynningu á nýjustu kynlífstækjunum á markaðnum áður en Guðmundur Einar uppistandari steig á svið og lét salinn hristast af hlátri með bráðfyndnu uppistandi sínu.

Í lok kvöldsins var svo ný heimasíða Tilveru – tilvera.is – formlega opnuð. Þar má finna fræðslu, stuðning og samfélag fyrir alla sem vilja fræðast um ófrjósemi og tengd málefni.

Vitundarvakningarvikan fór afar vel fram og fékk góðar viðtökur. Hún minnti á mikilvægi þess að halda áfram að tala opinskátt um ófrjósemi – því með fræðslu, samstöðu og samtali getum við dregið úr fordómum, aukið skilning og stutt þau sem standa frammi fyrir þessum áskorunum.

Tilvera þakkar öllum sem tóku þátt í vikunni og hvetur alla til að kynna sér efnið á nýju heimasíðunni tilvera.is – og taka þátt í að halda umræðunni lifandi.

Aðalfundur 2025

Fri, 07 Nov 2025 10:03:43 GMT

Aðalfundur 2025

Aðalfundur Tilveru, samtaka um ófrjósemi, var haldinn í húsnæði félagsins að Sigtúni 42 þann 6. nóvember 2025.

Fundurinn var vel sóttur og fór fram í góðum anda.

María Rut Baldursdóttir, formaður, flutti skýrslu stjórnar fyrir starfsárið 2024–2025.

Þar kom fram að árið einkenndist af samstöðu, virkni og áframhaldandi uppbyggingu á starfi félagsins. Tilvera hélt úti reglulegri fræðslu og stuðningi fyrir félagsfólk, tók þátt í alþjóðlegu samstarfi og stóð fyrir norrænum fundi í Reykjavík í september.

Gjaldkeri Sigríður Auðunsdóttir kynnti reikninga félagsins, sem voru samþykktir án athugasemda, og ný stjórn var kjörin.
Alda Magnúsdóttir Jacobssen bætist nú í stjórn Tilveru ásamt þeim sem fyrir eru í stjórn og skipar stjórn Maríu Rut Baldursdóttur formaður, Erlu Rut Haraldsdóttur varaformaður, Sigríði Auðunsdóttur gjaldkeri, Önnu Þorsteinsdóttur ritara og Jenny Eriksson meðstjórnanda.

Einnig voru samþykktar breytingar á lögum félagsins sem miða að skýrara skipulagi og auknum sveigjanleika í starfsemi.

Formaður þakkaði félagsfólki, samstarfsaðilum og styrktaraðilum fyrir góðan stuðning á árinu og hvatti fleiri til að taka virkan þátt í starfi félagsins.

Hér má sjá breytingar á nokkrum greinum í lögum félagsins, en heildarlög félagsins verða birt á heimasíðunni.

Lög Tilveru

I. Heiti, heimili og markmið

1. grein
Nafn samtakanna er Tilvera, samtök um ófrjósemi. Á ensku heita samtökin The Icelandic Infertility Association. Heimilisfang samtakanna er á skrifstofu félagsins hverju sinni og varnarþing í því sveitarfélagi.

2. grein
Markmið félagsins er að vera málsvari þess fólks sem á við ófrjósemi að stríða út á við, gagnvart heilbrigðisyfirvöldum og annars staðar þar sem þurfa þykir. Einnig er félagið málsvari annarra sem þurfa að nýta sér tæknifrjóvgunarmeðferðir. Þá gætir félagið hagsmuna þessara hópa og skal veita almenna fræðslu um mál sem varða skjólstæðinga Tilveru á heimasíðu sinni, samfélagsmiðlum og með öðrum leiðum eftir því sem kostur er.

II. Aðalfundur Tilveru

3. grein
Aðalfundur Tilveru fer með æðsta vald í málefnum félagsins. Aðalfund skal halda árlega og eigi síðar en 1. desember hvert ár, eða þegar stjórn hefur tök á því. Staðsetning fundarins skal vera á höfuðborgarsvæðinu.

Stjórn félagsins skal boða til aðalfundar á heimasíðu og/eða samfélagsmiðlum félagsins og eftir atvikum með tilkynningum í fjölmiðlum og tölvupósti til félagsmanna ef ástæða þykir til. Boðað skal til aðalfundar með minnst sjö daga fyrirvara og skal þar koma fram dagsetning fundarins, dagskrá og fundarstaður. Telst hann löglegur sé rétt til hans boðað.

Dagskrá fundarins skal vera þessi:
1. Setning fundar og dagskrá kynnt.
2. Kosning fundarstjóra og fundarritara.
3. Skýrsla stjórnar og umræða.
4. Skoðaðir reikningar lagðir fram og bornir upp til samþykktar.
5. Félagsgjöld næsta árs ákveðin.
6. Skýrslur nefnda, ef kjörnar hafa verið.
7. Tillögur/lagabreytingar frá stjórn, nefndum eða félagsmönnum.
8. Kjör stjórnar og varamanna og skoðunarmanna reikninga.
9. Önnur mál.

Atkvæðisrétt á aðalfundi hafa þeir einir sem standa í skilum á félagsgjöldum. Eitt greitt félagsgjald jafngildir einu atkvæði, hvort sem um er að ræða félag, par eða einstakling.

Aukaaðalfund skal halda ef meirihluti stjórnar eða fimmtungur félagsmanna í félaginu óskar þess. Fundurinn skal boðaður með minnst viku fyrirvara. Sitja þeir stjórnarmenn sem þar eru kosnir til næsta reglulega aðalfundar.

III. Félagar í samtökunum

4. grein
Félagar í Tilveru geta orðið þeir einstaklingar, félög og fyrirtæki, sem vilja styðja við markmið félagsins og gengst undir lög þessi. Heiðursfélagar geta þeir orðið sem unnið hafa sérstakt starf að málefnum tengdum ófrjósemi. Stjórn tekur ákvörðun um kjör heiðursfélaga og er því lýst á aðalfundi.
Hægt er að gerast velunnari félagsins með því að greiða árgjald eða frjálst framlag til félagsins.

5. grein
Reikningsár félagsins er frá 1. október til 30. september næsta ár. Félagsgjald skal ákveða á aðalfundi ár hvert og félagsgjald er innheimt einu sinni á ári. Sá sem ekki greiðir félagsgjald fellur sjálfkrafa út úr öllum hópum samtakanna og af félagsskrá.

Vitundarvakningarvika Tilveru 2025

Thu, 30 Oct 2025 19:13:38 GMT

Vitundarvakningarvika um ófrjósemi 2025

Þekking á frjósemi er ekki lúxus – hún er lífsnauðsyn

Dagana 1.–9. nóvember 2025 heldur Tilvera – samtök um ófrjósemi – upp á Vitundarvakningarviku um ófrjósemi. Markmið vikunnar er að efla fræðslu og skilning á ófrjósemi, brjóta niður þögn og fordóma og minna á að þekking á líkamanum er ekki lúxus, heldur lífsnauðsyn.

Í ár ber vitundarvakningin yfirskriftina Facts Forward – Education and Information, sem undirstrikar mikilvægi þess að allir hafi aðgang að áreiðanlegum upplýsingum um frjósemi. Þekking á líkamanum okkar er ekki forréttindi heldur réttur allra. Þegar við vitum, getum við valið – og þegar við getum valið, getum við lifað lífi sem er í takt við það sem við raunverulega þráum og viljum.

Vikan hefst helgina 1.–2. nóvember þegar Tilvera verður í Smáralind að selja happdrættismiða og söluvarning. Allur ágóði rennur til félagsins og styður starf sem miðar að því að veita félagsfólki stuðning, fræðslu og samstöðu.

Mánudaginn 3. nóvember verður opinn stuðningsfundur í Sigtúni 42 klukkan 20. Þar gefst fólki kostur á að ræða reynslu sína og finna samhug í öruggu og hlýju umhverfi. Sama dag birtist einnig fyrsta skoðunargreinin á Vísi, þar sem fjallað verður um rétt okkar allra til upplýsinga og fræðslu um frjósemi.

Þriðjudaginn 4. nóvember býður félagið félagsfólki sínu upp á frí sálfræðiráðgjöf, en þann dag geta félagsfólk nýtt sér símaráðgjöf sálfræðings án endurgjalds. Ef þið hafið áhuga að þiggja þessa ráðgjöf þá hvetjum við ykkur til að ská ykkur í félagið og þá hafið þið aðgang af öllum lokuðu facebook hópum Tilveru.

Miðvikudaginn 5. nóvember birtist önnur grein á Vísi sem heldur áfram að varpa ljósi á málefni ófrjósemi og mikilvægi þess að samfélagið tali opinskátt um frjósemi og þá fjölbreyttu reynslu sem henni fylgir.

Fimmtudagskvöldið 6. nóvember verður haldið skemmtikvöld í Sigtúni 42 sem markar jafnframt formlega opnun nýrrar heimasíðu Tilveru. Kvöldið hefst klukkan 19:30 með stuttu erindi frá Áslaugu Kristjánsdóttur, kynfræðingi, sem fjallar um kynlíf og ófrjósemi. Fulltrúi frá Hermosa mun kynna nýjustu kynlífstækin á markaðnum og bjóða gestum að skoða og kaupa vörur á góðu verði. Þá stígur Guðmundur Einar á svið með uppistand, og eins og þeir sem sáu sýninguna Lítill töffari vita, er þar von á frábærri skemmtun. Búbblur, léttar veitingar og góð stemning gera kvöldið að hátíð samveru og gleði. Aðgangur er ókeypis og öll eru hjartanlega velkomin, en félagsfólk Tilveru er sérstaklega hvatt til að mæta.

Á föstudeginum 7. nóvember birtist enn ein skoðunargrein á Vísi og um helgina, 8.–9. nóvember, verður Tilvera í Kringlunni með bás þar sem gestir geta kynnt sér starfsemi félagsins, keypt happdrættismiða og söluvarning og átt samtal við fulltrúa félagsins.

Vitundarvakningarvikan er mikilvægur liður í starfi Tilveru. Með henni vill félagið auka skilning, brjóta niður þögnina sem oft umlykur ófrjósemi og hvetja til samkenndar og umræðu. Þegar við tölum, fræðum og hlustum skapast samhugur – og úr honum sprettur von.

Þekking á frjósemi er ekki lúxus. Hún er lífsnauðsyn.

Nú er kominn tími til að tala – af ábyrgð, virðingu og kærleika.

Gleðilega vitundarvakningarviku Tilveru.

Jólahappdrætti

Thu, 30 Oct 2025 09:29:33 GMT

Jólahappdrætti

Taktu þátt í styrktarhappdrætti Tilveru!

Kauptu happdrættismiða og styrktu starfsemi Tilveru – samtaka um ófrjósemi.

Allur ágóði rennur beint í að styðja við félagsfólk með:
Mánaðarlega stuðningshópa þar sem fólk getur hist og rætt saman í öruggu umhverfi.
Fjölbreytta viðburði og fræðslur yfir árið – öllu félagsfólki að kostnaðarlausu.
Símaráðgjöf sálfræðings sem stendur félagsfólki til boða mánaðarlega.

Verð á miða: 2.900 kr.
Dregið verður 11. desember 2025 kl. 20:00 í Sigtúni 42.
Veglegir vinningar í boði frá fjölmörgum fyrirtækjum um land allt!

Með því að kaupa miða tekur þú þátt í að gera starfið okkar mögulegt – og gætir jafnframt unnið frábæran vinning!

Takk fyrir að styðja Tilveru

Aðalfundur Tilveru

Tue, 28 Oct 2025 09:39:35 GMT

Aðalfundur Tilveru

Aðalfundur Tilveru

Aðalfundur Tilveru sem halda átti 28.október sl. en var frestað vegna veðurs verður haldinn fimmtudaginn

6.nóvember 2025 kl. 18:00 í Sigtúni 42, sama

húsnæði og ÖBÍ.

Dagskrá:

Hefðbundin aðalfundarstörf

Skýrsla stjórnar

Skýrsla gjaldkera

Kosningar

Breytingar á lögum félagsins

Önnur mál

Félagsfólk eru hvatt til að mæta og gefa kost á sér í stjórn.

Hlökkum til að sjá sem flesta!

Kær kveðja,

Stjórn Tilveru

Fréttabréf september 2025

Mon, 01 Sep 2025 18:48:22 GMT

Fréttabréf september 2025

Kæru félagar,

Vonandi hafið þið notið sumarsins.

Okkur langar að senda ykkur nokkur orð um það helsta sem hefur verið að gerast hjá félaginu frá síðasta fréttabréfi.

Í mars fór María, formaður Tilveru, til Brussel á árlegan vorfund Fertility Europe. Þar var megináherslan á FActs!-fræðsluleikinn og hvernig megi auka vitund og fræðslu um frjósemi meðal ungs fólks. Fundurinn heppnaðist afar vel og var bæði fræðandi og hvetjandi.

Í apríl hélt félagið páskaeggjaleit fyrir börn og fullorðna í Gufunesi. Góð þátttaka var í skemmtilegri leit, þar sem öll börn fengu páskaegg og glaðning að launum.

Mánaðarlegu stuðnings kvöldin, hin svokölluðu kaffihúsaspjöll, hafa einnig verið vel sótt. Slík kvöld eru afar mikilvæg fyrir félagsfólk, þar sem þau bjóða upp á tækifæri til að ræða opinskátt við fólk sem skilur aðstæðurnar og veitir gagnlegan stuðning.

Í júlí fóru Sigríður og Jenny til Parísar á ráðstefnu á vegum ESHRE, sem er ein sú stærsta í heimi um tæknifrjóvgun og ófrjósemi. Þær sóttu fjölmarga áhugaverða fyrirlestra um nýjustu rannsóknir og þróun á þessu sviði. Auk þess að efla tengslin við önnur systurfélög innan FE. Á ráðstefnunni fór einnig fram aðalfundur Fertility Europe, þar sem meðal annars var kosin nýja stjórn og rætt um takmarkanir varðandi gjafakynfrumur. Einn áhrifaríkasti viðburðurinn var frásögn einstaklings sem deildi sinni persónulegu reynslu af ófrjósemi.

Reykjavíkurmaraþonið var haldið 23. ágúst og hlupu þrjár konur fyrir félagið. Við þökkum þeim kærlega fyrir að hlaupa fyrir okkur og safna áheitum.

Í lok ágúst hófust stuðnings kvöldin aftur eftir sumarhlé, og það fyrsta var haldið þann 27. ágúst. Áfram verður boðið upp á þessi kvöld í vetur.

Dagana 12.–14. september fer fram fundur Nordic Fertility Network sem eru félagasamtök um ófrjósemi á Norðurlöndum hér á Íslandi, og tekur Tilvera þátt í skipulagningu hans. Fulltrúar frá Danmörku, Noregi, Svíþjóð og Finnlandi munu heimsækja landið og funda saman. Aðalumræðuefnið í ár verður andleg líðan fólks sem glímir við ófrjósemi.

Stjórnin er svo á fullu að plana viðburði fyrir haustið og hlökkum við til að deila með ykkur.

Við viljum svo aftur minna á að borga félagsgjöldin. En þau eru mikilvæg til að halda starfsemi félagsins áfram.

Hlökkum til að hitta ykkur sem flest í haust!

Stjórn Tilveru

Fréttabréf mars 2025

Mon, 31 Mar 2025 18:51:59 GMT

Fréttabréf mars 2025

Heil og sæl kæra félagsfólk Tilveru!

Stjórn Tilveru langaði að endurvekja fréttabréf Tilveru og með því ná betur til félagsfólks samtakanna. Í fréttabréfinu munum við upplýsa betur um starf samtakanna og hvað er í deiglunni á næstunni. Stefnt er að því að fjögur fréttabréf birtast á ári, svo fylgist með. Ef þið hafið áhuga á að senda okkur fréttir eða upplýsingar sem þið teljið eiga heima í fréttabréfinu þá sendið okkur póst á tilvera@tilvera.is

Verið er að leggja lokahönd á nýja heimasíðu samtakanna sem við vonumst til að verði aðgengilegri fyrir félagsfólk og þar munum við auka aðgengi að fræðslu um ófrjósemi og beina fólk í rétta átt varðandi aðstoð.

Í lok síðasta árs var árlegt happdrætti Tilveru haldið og heppnaðist það mjög vel. Fengum við fullt af flottum vinningum í happdrættið frá frábærum styrktaraðilum og miðasalan gekk vonum framar. Enn eru nokkrir vinningar ósóttir þannig að endilega látið okkur vita ef þið eigið ósótta vinninga.

Tilvera hefur í gegnum árin verið með ókeypis sálfræðiráðgjöf einu sinni í mánuði hjá Aldísi Evu Friðriksdóttur sálfræðingi fyrir félagsfólk og hefur þar ávallt verið mjög góð skráning í tímana. Þetta er mjög mikilvæg þjónusta sem Tilvera býður upp á uppá og stefnan er að halda því áfram á árinu. Tímarnir eru auglýstir inni á Facebook hópum Tilveru.

Kaffihúsaspjöll Tilveru hafa einnig verið vinsæl og góð leið fyrir félagsfólk að hitta og spjalla við aðra sem eru í sömu stöðu, fá ráð og stuðning. Kaffihúsaspjöllin verða áfram partur af dagskránni einu sinni í mánuði í húsakynnum okkar í Sigtúni 42 og eru auglýst vel inn á síðum félagsins.

Stjórnin ákvað síðasta haust að bæta við foreldramorgnum á dagskrá. Margt félagsfólk Tilveru sem nær árangri í meðferðum upplifir að þeir þurfi stuðning eftir að óléttan er staðfest eða barnið hefur fæðst. Gott er því að hitta fólk sem hefur gengið í gegnum það sama og þau. Foreldrahittingarnir hafa verið vel sóttir og er mikil ánægja með að hittast og spjalla. Ótrúlega gaman er að sjá börnin hittast og pör og foreldrar að tengjast.

Tilvera hefur í gegnum tiðina alltaf tekið á móti erlendum stofum sem vilja halda fundi á Íslandi og hitta skjólstæðingana sína í persónu áður en haldið er erlendis í meðferð. Stofur eins og Serum og IVF Riga hafa verið duglegir að koma til landsins. Síðasta haust bættist einnig við gríska stofan Sillipsis sem margir eru kunnugir þar sem starfsfólk þeirra starfaði áður hjá Serum í Aþenu. Við munum halda áfram að bjóða stofum upp á að koma til landsins og halda viðtöl með tilvonandi skjólstæðingum, en okkur finnst þetta mjög mikilvæg þjónusta fyrir félagsmenn.

Í febrúar fékk félagið boðsmiða frá Þjóðleikhúsinu á leiksýninguna Yerma. Sýningin fjallar um par sem gengur í gegnum ófrjósemi og áhrif sjúkdómsins á sambönd og líðan. Félagsfólk tók mjög vel í boðið og gaman að segja frá því að yfir 40 manns mættu á sýninguna. Þökkum Þjóðleikhúsinu kærlega fyrir mjög flotta sýningu og að vekja athygli á málstaðinn.

Í deiglunni á næstunni er að María, formaður Tilveru, mun fara út á vegum félagsins til Brussel þar sem hún mun sitja árlegan fund með Fertility Europe og fleiri aðildarfélögum. Mikilvægt er fyrir félagið að efla samstarf við önnur félög í Evrópu, skiptast á reynslu og fræðast enn meira til að geta unnið vel fyrir okkar málefni. T.d. hefur Fertility Europe búið til leik áætlaðan fyrir unglingastig í grunnskóla semTilvera hefur nú þýtt og er stefnan á að koma þeim leik inn í skóla landsins. Leikurinn heitir FActs! og mun líka vera aðgengilegur á nýrri heimasíðu Tilveru.

12. apríl verður svo árleg páskaeggjaleit Tilveru. Þá verður búið að fela fullt af páskaeggjum sem börnin mega leita að. Páskaeggjaleitin hefur alltaf verið mjög skemmtilegur viðburður og vinsæll meðal barna og fullorðinna.

25.maí munum við svo halda árlegt sumargrilll. Grillaðar verða pulsur og hamborgarar og skemmtum okkur saman.

Hlökkum til að hitta ykkur!

Stjórn Tilveru