Ég og annar þerapisti erum að velta fyrir okkur að fara af stað með hópráðgjöf/stuðning fyrir konur sem eru í erfiðum barneignartilraunum. Ég er að velta fyrir mér hvers kyns hópi sé mestur áhugi fyrir og ákvað því að útbúa könnun sem fer hér að ofan.

Tilvera styrkti mig fyrir tveimur árum til að fara á námskeið í Boston hjá Alice Domar, sálfræðingi sem hefur sérhæft sig í svokölluðum Mind/Body hópi fyrir konur sem eru að reyna að eignast börn. Rannsóknir á þesskonar hópum sýna að líðan kvenna batnar til muna, þunglyndis- og kvíðaeinkenni minnka. Konur upplifa sig "sterkari" og geta betur tekist á við þá líðan sem fylgir "ófrjósemi". Ennfremur sýna rannsóknir að 54% þeirra kvenna sem taka þátt í þeim eru orðnar ófrískar innan árs meðan 20% kvenna í samanburðarhópi eru orðnar ófrískar innan árs. Alice mælir með þessu inngripi til að m.a. vega upp á móti ófrjósemi tengdri aldri kvenna þar sem líkurnar á þungun virðast aukast við betri líðan. Um væri að ræða hóp byggðan á þessum fræðum, en í hópum hennar er hist vikulega í 9 vikur í tvo og hálfan tíma í senn. Farið er yfir ýmiskonar fræðslu, heimaverkefni, bjargráð kennd, slökun í hvert skipti, hópstuðningur, o.fl.

Þátttakendur yrðu bundnir trúnaði gagnvart hverri annarri um það sem fram kemur í þessum hópum.

Verðið færi eftir útfærslu á hópunum, þ.e. hvort við förum alveg eftir hugmyndum Alice eða ekki. Ég á þó von á því að slíkt úrræði færi ekki undir 65.000 kr per þátttakanda, en það er algengt verð á hópúrræði þessa dagana - í þeim tilfellum er reyndar um færri skipti að ræða og styttri tíma í hvert skipti, þannig að það á eftir að skoða verðið betur. E.t.v. er líka hægt að sækja um einhverja styrki til að lækka verðið. Ég geri mér grein fyrir því að meðferðir á ART Medica eru dýrar og oft tómt í buddunni eftir meðferð.

Endilega segið mér hvað ykkur finnst um þessa hugmynd. Ef þið viljið ekki svara með pósti, sendið mér þá pælingar ykkar í einkaskilaboðum.

Kærar þakkir!